Sunnudagurinn 15. október varð notadrjúgur við gerð myndarinnar um Örkina. Flogið var austur á flugbrautina við Snæfell þar sem Þórir Gíslason var mættur á ofurjeppanum “Hrolli” og við fórum niður á bakka Hálslóns til að draga Örkina á flot.  
 

 
Frábært veður var í þessum dýpsta og skjólsælasta dal norðurhálendisins og siglt um alla kima Hálslóns, sem er orðið næstum 15 kílómetra langt, nær upp meðfram Hraukahjalla og hefur sökkt hluta af Kringilsárrana. Nú var hægt að sigla inn í svonefnda Stuðlagátt upp að ónefndum fossi í Kringilsá, sem hefur verið í sumarham vegna hlýinda og rigninga. Þetta var óviðjafnanleg sigling, stuðlaberg í stíl Þjóðleikhússins á báða bóga og fossinn í botninum.  
 
Einnig var flott stuðlaberg að sökkva rétt fyrir utan Hraukahjalla og margar víkur og vogar við Lindur buðu upp á hafnarstæði. En stutt er þangað til Lindur og hjallarnir allir á hæð við þær ásamt þessum hafnarstæðum sökkva í mun breiðara lón.  
 

 
Eftir siglinguna var Örkin dregin upp að varnargarðsveginum, sem marka á austurströnd Hálslóns og verður þar væntanlega á hvolfi þangað til næsta vor. Þóri er þökkuð hjálpin við þessa ferð sem hefði verið óhugsandi án aðstoðarmanns á borð við hann.  
 

 
Komin var þoka og því varð að skilja flugvélina eftir við Snæfell. Daginn eftir var farið á Súkkujeppanum gamla upp eftir og flugvélin sótt í erfiðri ferð, hríð var og dimmviðri, kominn snjór á flugbrautina og flugvélin öll ísuð. Guðmundur á Vaði fór síðan með mér til að sækja jeppann sem ég hafði skilið eftir og eru honum færðar hinar bestu þakkir fyrir aðstoðina.  
 

 
Í gær (17. október) var síðan flogið frá Egilsstöðum til Reykjavíkur með viðkomu á Hraukahjalla og Sauðármel. Félagar úr Þyt í Mosfellsbæ komu austur á þremur flugvélum og lentu á báðum brautunum. Sandskeiðið er að sökkva og fossinn í Stuðlagátt sömuleiðis. Mikið var um myndatökur í þessari síðustu ferð austur að sinni.  
 
Í síðustu viku var farið með svörtu Toyjotuna frá Sauðármel suður og til stendur að fara með gamla Skódann, árgerð 1984, sem hefur verið á Egilsstaðaflugvelli, til Ystafells þar sem hann verður á safni við hliðina á Skoda Ingimars Eydals. Skodinn er fyrir löngu búinn að borga sig upp, því meðan hans naut við þurfti ekki að taka bílaleigubíla. En nú er svo margt að honum að ekki borgar sig að gera við hann, enda ekki fjármagn til þess.    
 
(20. okt. 2006 kl. 00:36 - Nú er verið er að yfirfæra myndir og munu þær væntanlega verða settar inn í Myndasafnið á vefnum af Ófni. Þetta er svo mikið myndasafn að við erum að byrja að flokka myndirnar og setjum þær inn jafnóðum og þær klárast. Myndirnar hér að ofan eru úr þeirri seríu.)